مهاترات جوزيه وخترفة حمادة إمام
أولا نهنئ كل الأهلاوية على فوزنا على أرض المنافس الزمالك وإن شاء الله قطعنا أكثر من نصف المشوار للنهائي بإذن الله .
الصراحة المباراة جاءت دون المستوى المرجو من نادي القرن الأهلى الأسطورة تماما وأسوأ مافي المباراة هى مفاجأت جوزيه المزعومة والتمركز الخاطيء وإنخفاض مستوى الاعبين وماكنتش شايف أى فكر لجوزيه على أرض الواقع والماتش خلص كده بالبركة وبمجهود اللعيبة الذاتي , وعاب النادي الأهلي الكثير مثل بعد خط الوسط عن المهاجمين واللمسة الأخيرة زي الزفت , ولا أعرف إيه اللى صبر جوزيه على حسام عاشور الذى كان عبئا على خط وسط النادي الأهلي وليه خرج تريكة وهو التغيير الذى قلب المباراة ورغم إحترامي لجوزيه وقدراته إلا إنه له شطحات مع نفسه بتودي فى داهية وفى موسم الـ 6/1 مننساش مباراة الدور الأول واللى فاز الزمالك فيها 2/1 وكان الأهلي زى ما يكون مدرسة إعدادي جاية من حارة ولا قرية وبتلعب .
الزمالك معملش حاجة وبكرة طفش للاعب المحظوظ جدا على الأهلي حازم إمام اللى مكنش قاصد يسدد هو كان عايز يمررها لعبد اللطيف طست وتهيأت أمامه وبدعاء الحاجة ماجي والدة حازم دخلت جون وأخذت الزملكاوية الجلالة وظنوا إنهم ممكن يعملوا حاجة أمام المرشح الأول للبطولة واللى للأسف أعطاهم الفرصة للتمادي فى السلطنة اللى متسلطننها ولعله لم يكن يخفى عليكم كيف أحسسنا كلنا إن الزمالك جاي وعارف إنه خسران خسران لكن هدفهم تقليل الخسارة قدر الإمكان والدليل إن فى عز سيطرة النادي الأهلي على المباراة بعد الهدف الثاني الكاميرا جت على مرتضى منصور وهو يبتسم أثناء حديثه مع أحد أعضاء مجلس الإدارة!!!!! ولولا إهدار الفرص السهلة بطريقة غريبة كنا فرحنا إحنا فيه فرحة.
حكم الراية اللى كان عند مدرجات الدرجة الثالثة مش عارف عنيه فى قفاه ولا إيه وضيع علينا 3 إنفرادات بحجة التسلل الوهمي وخلى المباراة إتكهربت لكن الحمد لله ربنا ستر.
أما ياجماعة اللى تابع المباراة على art كان هيتخنق خنقة من حمادة إمام والظاهر الراجل دخل فى أعراض الشيخوخة خلاص أخطائه كانت كتير وأول مرة أعرف إن أحمد السيد إسمه محمد السيد وحسام عاشور إسمه حسام خورشيد ده غير بقى التعليقات الغريبة من نوع حازم إداها لحازم وشاطها حازم وكأن الـ 11لعيبة إسمهم حازم على فكرة أكرم لتاريخه إنه يقعد فى البيت ويريحنا ويحلم بحازم براحته.
أما بقى المباراة القادمة فهى لن تكون سهلة على الإطلاق نتيجة إن الزملكاوية دخل فى دماغهم إنهم يقدروا يجاروا النادي الأهلي ولو كنتوا شفتوا الجمهور الأبيض أد إيه كان فرحان بهذه النتيجة كنتوا إفتكرتوا إن الزمالك كسب البطولة , لذلك على اللعيبة مصالحة جمهورهم العريض واللى شرفنا كلنا بحضوره الكثيف رغم العراقيل التى وضعها مرتضى المحسور أمامه.
