هذا ما حلمت به ليلة أمس ..

[GOLDEN_#1®]

السلام عليكم جميعا



حابب اني اتشارك معكن بالمنام يلي شفته امبارح , لعلنا نتعظ منه .

و ان شاء الله اتوفق و احسن انقل الصورة يلي شفتها بأكبر قدر ممكن من الاحاسيس ..



حلمت يا سادة ( خير انشاء الله وبالصلاة عالنبي ) ...


قال بكون نازل من مدخل البناية .. و عم افتح الباب تبع المدخل .. و عم اتطلع لناح الشارع
يلي بيبعد عني حوالي 12 متر ( يلي هو طول مدخل البناية )
و بعرف حالي انو نازل على اساس وقت الظهر ,او العصر
يعني المفروض انو شوف لون البناية ( من اثر انعكاس اشعةالشمس ) يكون على اصفر ..

و لكن بشوف اللون ضارب على ازرق .. يعني متل وقت الفجر و ما بعده بدقائق ..

و بتطلع هيك لناح الطريق و الرصيف .. بشوف في عالم عم يطلعوا من الرصيف .. من الارض ..

شو هدول ؟

هدول أموات عم يطلعو من الارض ... و عم يمشو باتجاه مركز المدينة

و الرصيف ماعاد حجارة ,, صاير على تراب .. من كتر ما عم يطلع حفر وناس ..

هالاموات شو يا حزركن؟


قال هدول كلشي مدفون بهالمنطقة من قبل .. عم يطلعو .. كل الاموت ... ليش ؟


"" لانو اليوم هو يوم القيامة "

منظر مرعب .. مخيف ,, انا لهلحظة كل ما اتذكره بخاف ,, بخاف عن جد
شفت الرهبة بعيوني ,, و حسيت فيها , عشت لحظات وكأنو بالفعل يوم حقيقي مو حلم , كاني عشته بحق ..


بتطلع على يساري , بشوف في عالم كمان عم يتطلعو و عم يقولوا ( العما شو بدنا نعمل ؟ )

انا بقول لحالي هون : ولي .. لك نحن منعرف يوم القيامة على انو شي مكتوب بالكتب و درسناه بالمدرسة ..

بس ما توقعت انو هو بالفعل قادم . ... يعني كلنا منآمن فيه ,, بس مو حاسبين انوبالفعل بدو يجي و نكون نحن فيه ..

وفجآة .. بحس انو معي يا دوب بضع ثواني او دقائق .. قبل ما يُنفخ بالصور .. و تبدا عملية الحساب ..

يا ويلي .. العمى شو عامل شغلات انا .. معقول هلئ رح اتحاسب عليها .؟؟؟ معقول خلص الوقت ؟؟

معقول هلئ كل ذرّة شر مساويها ,... بدي اتحاسب عليها ؟؟

ممكن فوت عالنار ؟؟ لك مافي ها مزح .. ليكها الشغلة صايرة . مو تخيل !! يا ويلي

معقول هلئ بدي اتسطح بالقبر لمدة طويلة ؟؟ لك انا اذا بقعد بغرفتي يلي 5x5 لمدة ساعتين بيديق خلئي
و بحس انو رح اختنق و انو لا زم اطلع ...

معقول بدي اعد بهالحفرة... .. سنييين ؟؟؟ قروووون؟؟ لك شلون هيك ؟



ياريت الوقت ماصار .. ياريت هلئ يلي انا فيه متل تجربة ..




طيب شو بدي ساوي ؟




بشوف العالم يلي ناحي بدن يلحقو يعملو شي من يلي مو مساوينه ...

اهم شي نحن ما عم نساويه بهالايام و مو متقيدين فيه .. و هو شي ( فرض ) علينا .. الصلاة !!

بتطلع هيك بقول .. هلئ كل صلاة ما صليتها بدي صليها بجهنم ؟


فبلائي كم واحد ناحي قال بدن يلحقو يصلو شي من يلي راح عليون ..يصلوها ( قضاء ) ,, يعني شو ما بيلحقو


فأنا بصلي الظهر , بنوي انو هي ( قضاء صلاة ظهر ) .. و ما اكثر الصلوات يلي مو مصليها
او مصليها قضاء ,, مو حاضر يعني ..


و بخلص صلاة .. و بتفرج هيك ...
بلاقي عالم اغلبهم اموات مبينين معي ( نظرا لبعد المسافة بيناتنا )
عم يتجو باتجاه مركز المدينة غالبا .. يعني باتجاه البلد مشان يكونو بساحة و يتحاسبو على كلشي عملوه ...


وهون بفيق ..


يا عالم صدقوني الاحساس مخيف مخيف لابعد الحدود .

كل مين لحاله ,

ماحدا مع حدا


و اسطة مافي ..

كرمال فلان مافي ..

بمعية فلان .. مافي



غير رحمة الله و شفاعة الرسول ... مافي ..



اعمل خيراً تحصد خيرا ... اعمل شرا .. يا ويلك .. يا لطيف



حبيت شارككن بهالمنام ... عسى تحسو ولو بجزء بسيط من الشعور المخيف و الرهبة يلي حسيتها ..



فلنتعظ يا عالم .. فلنكن كما أمرنا الله ان نكون


غضوا البصر .. احفظوا اللسان
احفظوا اعراضكم ..
ادفعوا الذكاة .. لك الذكاة فريضة يا عالم مو بخشيش من جيبتكن ! هي فرض .
حافظوا على الصلوات .. حافظوا على مكارم الاخلاق ..
حافظوا على حقوق العالم .. لا تاخدوا شي مو لالكن ,, لك لا تاكلو مال غيركن ..
لا حدا يستغيب حدا ..و لا يحكي بغيابه عنه بالعاطل او بالسوء ..
اياكم و معصية الله ..

الله وكيلكون حسيت حالي رجعت بالزمن من يوم القيامة ,, والله اني عم انصح ومو جايني شي ..


انشاء الله كون انا اول من يطبق هالشي و يتعظ من هالشوفة ..

اللهم اغفر لي وللمسلمين و المؤمنين اجمعين
اللهم لا تحاسبنا بما فعل السفهاء منا يا رب العالمين
اللهم رُدنا إلى ديننا رداً جميلا .. و اجعلنا من عبادك الصالحين
اللهم لا تذقنا عذاب النار او القبر .. و ادخلنا الجنة يا عزيز يا غفار
يا ذو الجلال و الاكرام يا كريم يا رحيم يا جبّار ..
و اصلح مافي نفوسنا ... و اعفوا عنا و عن اخطائنا ما تقدم منها و ما تأخر ..
و لا تحملنا ما لا طاقة لنا به .. و ارضى عنا يا رب العالمين
آمين

 

[troyDclick]

آمين يارب العالمين
احساس مخيف فعلا يا أخى
اللهم أعنا على ذكرك وشكرك وحسن عبادتك

 

[سراج جمال]

أظن أنك ذكرت ركنين من أهم أركان الإسلام و لكن أغفلت ذكر أعظمها و هو شهادة أن لا إله إلا الله و أن محمد رسول الله و يقول تعالى : ( و ما يؤمن أكثرهم بالله إلا و هم مشركون ) إنتم بتعرفوا شو هو الشرك ؟ سوف أكتب لكم موضوع بخصوص ذلك إن شاء الله .

 

[andrysa]

اللهم أعنا على ذكرك وشكرك وحسن عبادتك

 

[hamody]

آمين يارب العالمين
احساس مخيف فعلا يا أخى
اللهم أعنا على ذكرك وشكرك وحسن عبادتك

فعلا
اللهم اغفر لنا جميعا