رسالة الى الرئيس

[dark blue]

شوفو عمنا احمد فؤاد نجم بيقول اية

سيدي الرئيس

في عيد ميلادك الكام وسبعين

كل سنة وأنت طيب

واحنا مش طيبين

كل سنة وأنت حاكم

واحنا محكومين

واحنا مظلومين

واحنا متهانين

ويا ترى يا حبيب الملايين

فاكرنا ولا احنا خلاص منسيين

فاكر المعتقلين

فاكر الجعانين

فاكر المشردين

فاكر اللي ماتو محروقين

فاكر الغرقانين

الله يكون في عونك - هاتفتكر مين وللا مين

في عيد ميلادك الكام وسبعين

بقول لك كلمتين

الأوله

شيلتنا طين

وهل تعلم أن النيل بقى رشاح

والجو أصبح بيئة والعيشة ولعة

والشرفا قلوبهم عالبلد والعة

وانت عاملهم مذبحة ولا بتاعة القلعة

والاقتصاد سداح

والسرقة بقت كفاح

ومصر متاحة بس للسياح

وعرض البلد بقى مستباح

والتانية

ورتنا الويل

دا الخطوة في عهدك بقت ميل

والضحك بقى نواح وعويل

والكوسة

عارف الكوسة

ممكن أقولك فيها موواويل

والجامعة بقت يا إما كباريه أو دار مسنين

والشباب معظمهم من غير خمرة سكرانين

والعلم عز على المتعلمين

والأساتذة بقم دجالين

والقادة بقم طبالين

واديني في الهايف يا حبيب الملايين

والتالتة

عارف اليابانيين

زمان في سنة اتنين وخمسين

كان عندنا تروماي وكان عندنا علم ومتعلمين

وثقافة ومثقفين

وأدبا وعلما وفنانين

وكانو اليابانيين

بالنووي لسة مضروبين

وللصدقة مستحقين

دلوقتي إحنا فين وهما فين

هما فوق واحنا في أسفل سافلين

والرابعة

أمن البلد بقى تنين

والمحاكم اتملت مظالم

والعدالة بقت كمالة

وكلمة الحق في الزبالة

وأصحابها في الزنازين

والخامسة

القطاع العام…. عام

والفساد…. ساد

وفي جتة بلدنا بيرعى

أفتكر لجنابك إيه وللا إيه

وكل ذكرى ليك بدمعة

آآآآآآآآه آآآآآآآآه

أنا كنت حالف ميت يمين

أكملهم لك تمنية وسبعين

بس هاكفيهم ورق منين

وكل سنة وأنت

واحنا طيبين

بالذمة لو الرسالة دى راحت بجد هيتعمل فى الى باعتها اية​

 

[emadalzouk]

ولا حاجة حيركبوه يا اما مركب يا ما طيارة وده اكيد كفاية عليه علشان يحرم يكتب او يقراء حاااااجة زى كدة تااااااانى

 

[troy]

بجد بتكتب شعر رائع ياغالى

 

[d4bo]

لا تعليق

 

[dark blue]

لا هو مش مركب ولا طيارة

دول هيركبوة على البرج ويخلو الطيارات يتسلو علية

الف شكر على ردك ومرورك اخى emadalzouk

 

[dark blue]

دة مش كلامى ولا شعرى انا ياعم troy

دة كلام الشاعر الجميل احمد فؤاد نجم

 

[medhatshams2003]

يا جماعة هى طالبة معاكم اكتئاب ولا ايه ؟؟؟؟؟ والله الظروف مش وحشة للدرجة دى :ra: :ra: :ra:

 

[Lion Heart]

طول بالك يا عم جااسر لهدرجه اهل مصر بعانوو:ra: :ra:
طيب يا اخوان اطلعو على العراق او فلسطين او افغنستان والله هتشفو حالكم عايشين في نعمه
يا عم بكفي في عنا امان وبضل الاردن وسوريا ومصر وغيرها احسن من اخواننا في العراق وفلسطين الله يعينهم

والله يعينا على حكامنا ومش بس مصر بتعاني فيه كتييير شعوب عربيه بتعاني و...و.....و الى اخره:ra: بس هنعمل ايه

ووكلو امركم الى الله
ربنا مش رح ينسى حد وكل شي والو حسابو وهينسألو يوم القيامه عن رعيتهم وربنا هو يلي بياخذ حقنا منهم يوم الحساب


طوووول بالك حبيبي جاسر
مش عايزين نخسرك
lol lol lol

 

[dark blue]

انا عارف ان الظروف مش وحشة اوى كدة يا medhatshams2003

بس الشعر عجبنى فية خفة دم ممزوجة بشوية سخرية برضة فؤاد نجم جامد

الف شكر اخى على الرد والمرور الكريم

 

[dark blue]

عندك حق ياعم فراس والله الله يكون فى عون العراق وافغانستان

الله يعينا على حكامنا ومش بس مصر بتعاني فيه كتييير شعوب عربيه بتعاني و...و.....و الى اخره

حلوة الى اخرة دى يابرنس بس عندى طلب لو حبايبنا الحلوين قبضو عليا ابقى زرنى وهاتلى

معاك لابتوب وعيش وحلاوة علشان مزهقش هناك وسلملى على الى ربنا يجعل كلامنا خفيف عليهم

 

[MHMOODE]

ncom: ncom: ncom: ncom: ncom: ncom: ncom:

 

[dark blue]

شكلك خايف من حبايبنا الحلوين يا Mhmoode

لاتعليق احسن من تعليق يودى السجن

شكرا على ردك ومرورك ياغالى

 

[MHMOODE]

شكلك خايف من حبايبنا الحلوين يا Mhmoode

لاتعليق احسن من تعليق يودى السجن

شكرا على ردك ومرورك ياغالى

الموضوع مش موضوع خوف انا حاليا عندي معاناة من حبايبنا اللي ربنا يجعل كلامنا خفيف عليهم
فبقول بلاش ازود البلة طين

 

[dark blue]

والله يابنى عندك حق على راى المثل

طنش تعش تنتعش

 

[Mahmoud Hamdy]

احمد فؤاد نجم طول عمره كبير

وانت ياجاسر كبير thumb:

وياجماعة ده كلام يعنى نتكلم ونقرا احسن ما الواحد يطق ويموت

مش كده ولا ايه

وربنا يخللنا الريس حبيب الملايين:ra: ​

 

[dark blue]

اخجلتم تواضعنا بكلامك الرائع اخى Mahmoud Hamdy

وعلى راى عادل امام هشتكنا وبشتكنا ياريس :ra:

اللهم عرينا واكسية عاش الرئيس عاش الزعيم :wall:

الحلو الجميل ابو عيون جريئة

شرفت يابرنس وان شاء الله يكون الموضوع عجبك