hamody
كبار الشخصيات
~*¤®§(*§ رمضان كريم.. واحنا كمان!!! §*)§®¤*~ˆ°
الأكيد أن معظمنا بعد أن هنأ أقاربه وأصدقاءه وأحبابه بقدوم شهر رمضان وقال لهم "كل سنة وإنتم طيبين" لحق كلامه بالجملة الشهيرة "رمضان كريم"..
جميل.. طيب.. هل فينا من يعرف لماذا كان رمضان كريما.. ولماذا لا نكون كلنا "رمضان".. كرماء برضه؟!
رمضان كريم.. لأنه شهر عطاء فعلا.. يعطينا فرصا كتيرة جدا..
فرصة إننا نقرب من ربنا أكتر وأكتر..
وإننا نقرب من دينا أكتر وأكتر..
وإننا كمان نقرب من بعضنا من أهلنا وناسنا وأحبابنا اللي نسيناهم في الزحمة..
30 يوم كاملين عشان نعمل كل ده..
والجدع فينا اللي يخلي الـ30 يوم دول 365 يوم في السنة...
المشكلة إن فيه كتير مننا مش بيستحمل نص الـ30 يوم دول..
مش قصدنا إنه بيصوم 15 يوم في رمضان وبس..لأ..
قصدنا إن رمضان عنده النهار وبس..
يعني لغاية ما الشمس تغرب ويفطر ويتفرج على بكار.. كده رمضان بالنسبة له انتهى.. :wink:
يعيش بقى ليل رمضان كأنه أي ليل تاني..
يروح على أقرب قهوة يضرب له حجرين شيشة..
مفيش مانع خالــص إنـــه وهــو قــاعـــد ع الـــقهــوة، جارتــه تعدي من قدامـــــه وهي حاطة "full makeup" مش نهار رمضان عدى خلاص!".. يرمي لها كذا كلمة من اللي حفظهم من كتاب رسائل الغرام والعشق والسهوكة!
حتى لو ماعملش كده ونزل يتمشى مع أصحابه.. تلاقيه جاب في سيرة فلان وعلان وتيرتان "مين تيرتان ده!" ولو حد جه قال له "إنت صايم يا عم" يقول له:
"يا والدي احنا فطرنا خلاص.. سيبنا نطلع اللي جوانا بقى بعد الفطار.."
دول ناس..
وفيه ناس تانيين دول بقى لا بيطولوا رمضان بالنهار ولا باليل..
تلاقي الواحد منهم متنرفز وعصبي وعينيه بيطق منها الشرار..
ليه يا سيدي؟!
أصلي صايم.. وماشربتش سجاير طول النهار..
ويمكن حتى مايكونش بيشرب سجاير ويقول لك أصلي جعان ولا عطشان.. ومش طايق نفسي.. وعشان كده خلقي ضيق..
لأ يا سيدي.. ربنا -جل شأنه- وهو بيفرض الصوم مافرضهوش علينا عشان يضيق علينا حياتنا..
ولا عشان الواحد فينا وهو صايم يكون ماشي في الشارع يسب الناس بأسوأ الألفاظ.. "صايم بقى يا جدعان ومفيش عليه حرج".. مين قال كده؟!
احنا مش هنقول لكم الكلام اللي بيقولوه كل الدعاة
اجعل كل أيامك في السنة رمضان..
لأ..
احنا هنقول لك بس.. اجعل نهار رمضان زي ليل رمضان..
لو نجحت في ده..
أكيد وفعلا هتعرف تخلي كل أيامك رمضان..
كلنا عارفين إن رب رمضان هو رب كل الشهور التانية..
ومع ذلك ممكن نلتزم في رمضان وبس وباقي الشهور لأ..
احنا بقى بنقول لك كمان..
إن رب نهار رمضان هو رب ليل رمضان..
خليك كريم زي الشهر الكريم ده..
خليك كريم أول حاجة مع نفسك إنت..
وده مش هييجي إلا إذا خدت روح شهر رمضان وزرعتها في قلبك بالليل وبالنهار..
تفتكروا ممكن نقدر نعمل ده ازاي؟
شاركونا بأفكاركم..
ورمضان كريم.. وإنتم كمان..
